Kostnaður:           2880 kr. + mvg.

Mongdaravsláttur:

Eru tit 5 ella fleiri til fáa tit 10% í avsláttri – Nýt avsláttarkotuna: Tema10

Eru tit 10 ella fleiri fáa tit 15% í avsláttri – Nýt avsláttarkotuna: Tema15

Tit kunnu eisini tekna tykkum við at senda teldupost til synergi@synergi.fo ella ringja 322355

Svend Brinkmann: Statt fast

Ert tú ein av teimum mongu túsund, sum halda vinkulin hjá Svend Brinkmann um “at lata fara” er bæði áhugaverdur og brýtur upp úr nýggjum? Hevur tú kanska fylgt eitt sindur við Svend Brinkmann, síðani hann skrivaði nógv umrøddu bókina “Stå fast”?

Kom og hoyr boðið hjá Svend Brinkmann um, hvussu tú í veruleikanum kemur nærri tínum grundvirðum, við at standa fast og lata okkurt fara framvið.

Støðuga kravið um menning og broyting er tengt at óttanum um at standa í stað og at lata okkurt fara.

Tað, at vit áhaldandi skulu broytast, sær út til at vera tað einasta støðuga í okkara lívið. Bæði innan útbúgving og familju- og arbeiðslív, har eitt nú starvsfólkasamrøðurnar og coaching hoyrir við til dagligdagin.

Í sínum uppleggi spyr Svend Brinkmann, um vit nú hava nátt markinum fyri, hvussu smidlig og broytingarsinnað eitt menniskja kann megna at vera.

Hvørjar eru avleiðingarnar fyri integritetin og trivnaðin hjá okkum, tá tú áhaldandi skalt útvikla teg? Og hvørjar valmøguleikar hava tey, sum ynskja at standa fast?

Rane Willerslev: Hugsa vilt og kreativt

Sambært Rane Willerslev, hava vit so líðandi ment eina nullhugsjón, tá tað kemur til feilir. Vit tola ikki longur at feila. Alt skal eydnast fyrstu ferð, men her fara vit so dyggiliga skeiv, heldur hann. Vit eiga í staðin at fevna fólkum, sum gera feilir. Og eggja til kreativitet og dirvi til at royna nýggjar leiðir. Hóast tað ber í sær vandan fyri at gera mistøk.

Vit skulu finna dirvi til at gera mistøk og gera uppreistur ímóti nullhugsjónini. Men tað er ikki ov seint.

Vit kunnu náa at HUGSA VILT!

Í bókini hjá Rane Willerslev – Tænk vildt, det er guddommeligt at fejle – greiðir hann frá egnum royndum, sum eru heilt øðrvísi enn hjá teimum flestu. Rane hevur í sínari starvsleið tilvitað brúkt sítt forvitni, sína vitan, royndir og kreativa hugsanarhátt. Hann hevur havt eina spennandi karrieru sum antropolog, granskari, rithøvundur og umstríddur stjóri á Danmarks Nationalmuseum. Harafturat hevur hann eina tíð búð og granska í Sibiria, har hann mátti flýggja undan russisku mafiuni. Í fleiri mánaðir livdi hann í Sibiria, einans av tí, sum hann sjálvur kundi fanga.

Willerslev langar út eftir tí almenna, sum hann heldur er við at kvalast í New Public Management, tjekklistum og stívum reglum og mannagongdum. Misálit og eftirlit seyrar ígjøgnum tann almenna sektorin í so stóran mun, at kreativiteturin druknar. Er hetta bara galdandi í Danmark? Kenna vit okkurt aftur í Føroyum?

Rane Willerslev bjóðar tí – kanska serliga almenna sektorin – av at hugsa vilt.

Á kveikjandi fyrilestrinum hjá Rana Willerslev, kanst tú gleða teg til at hoyra m.a. hví hann heldur tað vera so týdningarmikið at vera forvitin, hugsa kreativt og vilt.

Tor Nørretranders: Hygg frameftir!

Heimskreppurnar liggja og lúra og summar eru í fullum blóma. Klimakreppa, demokratikreppa, koronakreppa, kalt kríggj, mótmælisgongur, Brexit, fake news osfr. osfr. Tað kennist kanska, sum alt er í holt við at fara í upploysn í hesum døgum. Sannleikin, samfelagið, sálarfriðurin.

Men sambært Nørretranders er ein nýggj upplýsningstíð á veg. Vi skulu taka okkum sjálvi í álvara, sum innfødd á planetini. Vit skulu finna dirvið til at hugsa sjálvstøðugt og at hugsa um hvønnannan.

Heimurin er vinarligur og menniskjuni eru fyrikomandi. Men okkara heimsmynd er skeiv. Tor Nørretranders heldur, at vit hava bæði møguleika og skyldu til at finna framtakshugin aftur og rudda upp í mýruni av heimsins trupulleikum.

Nørretranders er bæði náttúruvísindaligur, filosofiskur, politiskur og persónligur. Og hann hevur serliga góð evni til at miðla samanhangin á ein greiðan og áhugaverdan hátt.

Gleð teg til ein spennandi fyrilestur við Tor Nørretranders, ið er av fremstu miðlarum í Danmark innan náttúruvísindi.

Temadagurin er fyri øll, sum treingja til ein kveikjandi og hugnaligan dag, har høvið verður at síggja tingini í lívinum og arbeiðslívinum frá nýggjum sjónarhornum.  Bæði um tú ert við sum privatpersónur, sum starvsfólk ella um tú ert leiðari ella stjóri.

Temadagurin er eisini væl egnaður sum ein starvsfólkadagur, har øll deildin ella alt arbeiðsplássið eru við. Tit fáa eitt felags útgangsstøðið fyri framtíðar samrøður og samstarv. Bólkaavsláttur verður givin.

Írokna eru fyrilestrar og kjak við Svend Brinkmann, Rane Willerslev og Tor Nørretranders. Harumframt fært tú

• lættan morgunmat
• frokost
• drekkamunn seinnapartin við onkrum søtum afturvið

Gleð teg til ein serstakan dag, har vit hjúkla um teg 😉