Undirvísing, venjingar, lestrarbólkar, pensum og próvtøka

Aros Mini MBA er sett saman av 6 modulum við 6 undirvísingardøgum í 6 mánaðir (altso eitt modul og ein undirvísingardag um mánaðin í 6 mánaðir).

Til hvønn undirvísingardagin skalt tú lesa eitt pensum upp á umleið 200-300 síður. Og aftaná hvønn undirvísingardagin fært tú nakrar einstaklingsvenjingar og skal hittast við lestrarbólkinum hjá tær (tað er tó ikki krav, at tú luttekur í venjingum og lestrarbólki).

Eftirútbúgvingin endar við einari lítlari próvtøku.

MODUL #1

Strategisk leiðsla. Visiónir og strategiskar prosessir í einum broytiligum heimi. Leiðsla og burðardygd í nútímans fyritøkuni

– Undirvísararar: Henrik Ørholst og Steen Hildebrandt

Strategi snýr seg m.a. um at vera framtíðarhugaður. Leiðsla snýr seg m.a. um at binda saman nútíð og framtíð. Hon snýr seg um at skilja missiónina og visiónina hjá fyritøkuni og um at menna tær strategiir og ætlanir, sum skulu bera fyritøkuna inn í framtíðina.

Strategiska leiðslan er avgerandi, tá tað snýr seg um framtíðarmøguleikarnar hjá fyritøkuni, og í hesum modulinum gjøgnumganga vit hugtøk og fyrimyndir, sum hava týdning í hesum høpi.

Tí leggja vit í fyrsta modulinum í mini MBA’ini dent á grundleggjandi vandamál viðvíkjandi strategi – vit viðgera viðurskifti og ávirkanir bæði heima og í altjóða høpi. Heimurin rundan um fyritøkurnar er í støðugari broyting, og hetta hongur saman við, hvør strategisk støða og leiðsla, ið myndar fyritøkuna. Hvat er strategiska støðan og dagsskráin hjá fyritøkuni, og hvussu verða strategiskar greiningar gjørdar, og hvussu vera strategiskar avgerðir tiknar og tiltøk sett í verk í fyritøkuni? Samleikin og missiónin hjá fyritøkuni eru grundleggjandi útgangsstøði fyri hetta arbeiðið.

Tema, sum vit fara at viðgera á degnum (og í lesingini):

• Missión, visión og strategi
• Strategisk ráðlegging og leiðsla
• Strategi og virkisfyriskipan
• Umheimurin og tey, sum hava áhuga í fyritøkuni
• Burðardygd
• Strategi og virkismenning
• Strategiverkseting

Steen Hildebrandt verður við online. Hann hevur tað fyrsta uppleggið og tað ber til at seta spurningar og kjakast live við hann.
Fyrsta dagin møta vit kl. 08.00.

___________________

MODUL #2 

Frá strategi og megatrends til gerandisdag: Hvussu kanst tú sum leiðari byggja eitt undirstøði fyri menning av tínari fyritøku?

– Undirvísari: Claus Fadum Nissen

Um strategi er ein lýsing av, hvat endamálið er við fyritøkuni, er virkisfyrimyndin ein lýsing av, hvussu tú fert at røkka málinum. Við øðrum orðum: Um tú arbeiðir við strategiini eina ferð um árið, arbeiðir tú við virkisfyrimyndini hvønn dag!

Hetta er orsøkin til, at annað modulið í Mini MBA’ini leggur dent á virkisfyrimyndir, og hvussu tú sum leiðari kanst arbeiða við teimum. Og endamálið við modulinum er – púra einfalt – at búgva teg til hetta arbeiðið!

Tí byrja vit við at zooma út á megarákini, sum komandi nógvu árini fara at ávirka tín veruleika og tíni evni at røkka strategisku málunum, sum fyritøkan hevur sett sær. Tað eru fleiri ítøkilig viðurskifti, sum antin fara at fáa ella longu hava ávirkan á fyritøkuna hjá tær. Tá vit kanna hesi viðurskiftini nærri, verður tú betur før/ur fyri at stinga eina kós út í kortið saman við og fyri starvsfelagarnar.

Vit vísa tær amboð, sum geva tær førleika til neyvt at eftirkanna staklutirnar í fyritøku tínari og samanhangirnar teirra millum. Sum leiðari fert tú at kunna nýta amboðini at kjakast um avbjóðingar við leiðslufelagar tínar og gera eitt undirstøði fyri samstarv og samskifti, sum kann gera allari fyritøkuni greitt, hvagar leiðin gongur.

Tema, sum vit viðgera á degnum (og í lesingini):

• Megarák og hvussu tey ávirka heimin og teg
• Ítøkilig ávirkan frá robottum, individualisering, talgilding v.m.
• Virkisfyrimyndir í gjár, í dag og í morgin
• Disruption – hvat er tað, og hvussu arbeiða vit við tí?
• Ávirkanir í ymiskum vinnugreinum og geirum – einskilt/alment, stór/smá, úti/heima
• Hvussu arbeiði eg sum leiðari við hesum?

___________________

MODUL #3

Starvsfólkaleiðsla. Menniskjað í nútímans einskildu og almennu fyritøkuni. Fyritøkumenning, toymisleiðsla, sjálvsleiðsla, coaching

– Undirvísari: Mie Krog

Starvsfólkaleiðsla og Human Resource Management snúgva seg m.a. um leiðslu av menniskjum og menning av fyritøkum. Menniskju eru í miðdeplinum í øllum fyritøkum. Menniskju, førleikar, mentan saman við tøkni, infrakervi o.ø. eru grundarlagið fyri øll sløg av úrslitum, ið verða rokkin í nútímans fyritøkuni.

Ein fyritøka er sett saman av menniskjum. Í einihvørjari fyritøku eru fleiri hugtøk og spurningar, sum snúgva seg um menniskju, bæði einstaklingin, bólkar og alla fyritøkuna. Her eru HRM, leiðsla, fylgi, samstarv og samrøða øll týdningarmikil.

Menniskjað og menniskjalig sambond eru í miðdeplinum. HRM-hugtakið og praktiska arbeiðið við mátingum í HRM verða viðgjørd. Menniskja-, fyritøku- og samfelagsáskoðan eru týdningarmikil tema. Bólkatilgongdir, ósemjur, sambond o.a. eru fyribrigdi, sum eyðkenna lívið í einihvørjari fyritøku. Hvussu skulu vit arbeiða leiðsluliga og menningarliga við menniskjum og bólkum av menniskjum? Hvussu arbeiða vit við fundum, samráðingum, ósemjum, samrøðum, leiðslumenning v.m.?

Tema, sum vit fara at viðgera á degnum (og í lesingini):

• At leiða onnur
• Leiðaraleiklutir
• Leiðsla í ymiskum sløgum av fyritøkum
• Leiðsla tá gongur við og tá gongur ímóti
• Virðisgrundað leiðsla
• Performancegrundað leiðsla
• Margfeldisleiðsla
• Starvsfólkamenning
• At leiða seg sjálvan

___________________

MODUL #4

Broytingar. Leiðsla av broytingum og tilvitað arbeiði við resiliens.

– Undirvísari: Joachim Steenstrup

Broyting er ein grundleggjandi fortreyt í nútímans fyritøkum. Fyri fáum árum síðani tosaðu vit at kalla einans um tær broytingarnar, sum fyritøkan sjálv ætlaði at gera. Í dag er neyðugt eisini at fylgja við í teimum broytingunum, sum koma uttanífrá – ofta óvæntaðar og órógvandi. Tí seta vit í hesum modulinum sjóneykuna á øll sløg av broytingum, og vit leggja dent á at skilja, hvussu menniskju bera seg at í mun til broytingar.

Strategi og broyting hanga saman. Broyting er heldur ein støða enn eitt undantak. Allar fyritøkur (og leiðarar teirra) eiga at duga at skilja og handfara broytingar; bæði broytingar uttanífrá og broytingar, sum byrja í fyritøkuni. Tí fert tú í hesum modulinum at læra at skilja broytingarhugtakið; tey ítøkiligu, skipanarligu, hugsanar- og kensluligu brigdini av broyting. Hvussu skulu vit skilja samanhangirnar millum hesi ymisku brigdini av broyting?
Í hesum sambandi fara vit eisini at viðgera váða- og tøknileiðslu. At enda fara vit at tosa um resilienshugtakið, bæði viðvíkjandi fyritøku og einstakling.

Tema, sum vit viðgera á degnum (og í lesingini):

• Innovatión og innovatiónsleiðsla
• Broytingar og broytingarleiðsla
• Fyriskipanarligir samanhangir
• Resiliens og tilvitað arbeiði við resiliens
• Tann brennandi pallurin
• Samstørv
• Verktøka
• Tøkniligir broytingar
• Váðaleiðsla

___________________

MODUL #5

Produktivitetur. Búskapur. Máting av úrslitum. Virkismenning.

– Undirvísari: Bent Jørgensen

Leiðsla og fyriskipan snúgva seg um at fáa úrslit. Í nógvum støðum eru búskapur og tøl ein týðandi partur av leiðslu. Hugtøk frá roknskapar- og búskaparstýringini kunnu hava týdning fyri at fáa gjøgnumskygni og ávirkan í gerandisdagin.

Tosað verður um hugtakið “virksemið”. Men hvør virkisfyrimynd og -hugsanarháttur eyðkennir fyritøkuna? Búskapur og leiðsla verða ofta hildin at vera tað sama, og í øllum førum eru roknskapurin, úrslitini og vakstrarfatanin í miðdeplinum. Tosað verður ikki bara um ein, men um fleiri roknskapir.

Í hesum sambandi hevur máting stóran týdning: Hvat skal fyritøkan hjá tær máta, og hvussu skulu tit máta og miðla hetta? Produktivitetur, effektivitetur og góðska eru trý samanhangandi og týdningarmikil hugtøk. Hvussu væl dugir fyritøkan at gagnnýta neyðuga tilfeingið við atliti at framleiðslu av góðsku og nøgdsemi hjá viðskiftafólkinum hjá fyritøkuni, keyparum og brúkarum?

Tema, sum vit viðgera á degnum (og í lesingini):

• Roknskapir og úrslit
• Umhvørvis- og vitanarroknskapir
• Máting, leiðsla og stýring
• Leiðslufrágreiðing
• Skipan, strategi og máting
• Performance management
• Dimensiónir í vøkstrinum
• Lean-leiðsla

___________________

MODUL #6

Leiðarin sum persónur og samskiftari. Persónlig leiðsla og samskifti. Strategisk og persónlig ávirkan, relatiónir og leiðslusamskifti.

– Undirvísari: Annette Spanggaard

Leiðsla og fyristøða. Í hesum modulinum seta vit sjóneykuna á persónligu fyristøðuna. Persónleikin og samskiftið hjá leiðaranum, tín persónliga menning, leiklutir og autentisitetur eru í miðdepli.

Leiðsla og fyristøða verða útint av persónum. Sambond við onnur menniskju, fyritøkur og áhugað eru týdningarmikil. Ein fyritøka er sett saman av sambondum millum menniskju og deildir, og sjálv fyritøkan er til í torgreindum netverkum. Í hesum modulinum eru bæði persónleiki og sambond í miðdepli, og vit seta sjóneykuna á leiðaran sum persón og samskiftara. Saman við sambondum eru hugtøk sum leiklutir, persónleikatypur, miðlan og samrøða, vitanardeiling og samstarv í brennideplinum. Vit viðgera hesi tema og kanna tey frá ymiskum sjónarhornum og við kritiskum eygum.

Tema, sum verða viðgjørd á degnum (og í lesingini):

• Áskoðan á menniskjað og fyritøkuna
• Leiðarin sum persónur
• Leiðaraleiklutir og persónleikatypur
• Persónlig menning
• Samskiftisgongdir í fyritøkuni
• Persónligt samskifti: Vitan, kroppur, mál, nærvera
• Strongd í fyritøkum – kreppur og broytingarleiðsla

Sum nakað serligt fyri Aros Mini MBA hava Steen Hildebrandt og undirvísararnir sett saman títt pensum, so tekstirnir í høvuðsheitum eru á donskum. Tað er gjørt, av tí at granskingin vísir, at tað er lættast at læra á sínum móðurmáli – eisini hóast tú dugir væl enskt. Danskt er ikki føroyskt, men flestu føroyingar lesa og skilja danskt eins væl og teir skilja føroyskt. Nakrar av bókunum finnast sum ljóðbók. Ynskir tú at fáa alt lisið upp, ber til at brúka onkra app, taka mynd av síðunum og so fáa tað lisið upp.

Tekstirnir eru eitt bland av týðingum av altjóða “must-reads” og bestu donsku bókunum og greinunum. Harafturat hava er ein røð av valfríum eykalesingum millum tær ensktmæltu businessbøkurnar, sum enn ikki eru týddar til danskt.

Allar greinirnar og bøkurnar, sum tú skalt lesa, eru sjálvandi skrivaðar av viðurkendum fakfólki, leiðarum og serfrøðingum.

Hjá Aros Mini MBA eru ongar greinir, sum lesandi ella tey sjálvi hava skrivað. Eitt tað týdningarmesta, tá tú velur útbúgving, er, um tað eru dugnaligir undirvísarar og gott pensum. Hesir báðir tættirnir hava nevniliga størsta týdningin, tá tað kemur til góðskuna á tínari læring.

Tí er fullkomið gjøgnumskygni í sambandi við hesa útbúgving, so tú veitst, hvør kemur at undirvísa og hvat tú skalt lesa.

Fyri okkum snýr Aros Mini MBA seg um, at tú veruliga fært betri førleikar. Og ein lyklatáttur í hesum er, at tú fært ítøkiliga venjing.

Tí eru venjingar lagdar millum allar undirvísingardagarnar. Venjingarnar snúgva seg allar um at seta ástøðið og tey nýggju amboðini í samband við teg sum leiðara (ella komandi leiðara) og títt arbeiðspláss – so tú og arbeiðsgevarin fáa fullan ágóða av tínari Mini MBA.

Venjingarnar eru ikki kravdar, og tað er upp til tín, hvussu nógv tú fert at arbeiða við teimum. Venjingarnar eru útgangsstøðið fyri fundirnar við lestrarbólkinum (eisini valfríir).

Vit býta tey lesandi upp í lestrarbólkar, sum hittast 5-6 ferðir, meðan útbúgvingin er. Í lestrarbólkunum kunnu tit kjakast um pensum og venjingar – og ikki minst skifta orð um royndir og fáa sparring upp á støðurnar hjá tí einstaka lesandi og leiklutin sum leiðari. Luttøka í lestrarbólki er ikki eitt krav. Men vit viðmæla tað, av tí at tú fært nógv burturúr og er ein týðandi liður í útbúgvingini. Ein annar háttur at læra og fáa vitan uppá.

“Átakið við lestrarbólkum er sera gott. Og fundirnir við lestrarbólkinum hava kanska tvífaldað, hvussu nógv eg fekk burtur úr útbúgvingini”
– Jacob Christiansen, Orkla Foods Danmark.

Sum luttakari í Aros Mini MBA fært tú ein eksklusivan limaskap í Aros Management Club, har tú aftan á útbúgvingina fært dagføringar um evni í tíðini.

Tú fært ókeypis atgongd til fyrilestrar og masterclasses í Danmark við serfrøðingum og leiðarum úr vinnulívinum. Tú fært innbjóðing til eksklusiv leiðslutiltøk við javnlíkum. Og tú fært ríkan møguleika at netverka við hinar limirnar.